.
.
انا اللي فطمتِك عن حب امك وابوك
لحب رجلٍ غريب
انا البعيد القريب
عجيب وقتي معك
ووقتْ يبعدنا ويدنِينا عجيب
من قال اني عشقتْ غيرِك
انت القمر في ليل عمري
وانت السهر
وانت دفا شمسي
وانت المغيب
كذاب كل وقتي بدونك
وكذبة ,,
كل لحظة جميلة بعيده عن عيونك
لو كل البشر يبيعونك
اكتبي حروف اسمي
ترقص بين اوراقك
وتهمس لك
ليه طــّول غيابك
طالت ايامي على بابك
وانا باقي اتغـنّى بك
يا حبيب
طفله وتلعب مع الأيام
عشرين عام
تحسب اللعبه عشق وغرام
وهي تنزِف أوقات ووجع
وكل ليله تكسِــر اللعبه وتنام
وتحلم بفارس وسط كل هالزحام
وكل فارس يجيها
تكشف له الجرح يمكن يداويها
ويزيد جرحها جرح
ويروح يخليها
سلام يا قلبها المجروح
وسلام يا طفلة
رضعت من ثدي الجروح
وهي تضحك على جروحها وتخفيها
طفله مثل رغوة الأحلام
في كاس الليالي
وقفت بوادي الغرام
كلها فتنه
وللفتنه ثمن غالي
فتنه تخليك
تركض باخر الليل
بين فرسان وصعاليك
وسيوف ترقص بين اياديها
وشيوخ تصرخ تناديها
فتنه تنسيك
حاضرك قبل ماضيك
وانا باخر الوادي
انادي
انا اللي فطمتـِـك عن حب امك وابوك
انا الرجل الغريب
انا الحبيب
انا اللي لجل خاطر عيونك با موت
انا اللي نسيتيه
بين رقص السيوف
وبين عطر البشوت
طفلتي مدت ايديها بس كانت بعيد
ضاعت في زحمة العشاق
وانا باقي اردد واعيد
انا
اللي
فطمتك
عن حب امك وابوك
انا
الرجل
الغريب
وغابت عن عيوني
وبدا صوتي يغيب
.
.
